ចៅសង្កាត់អូរចាររបស់ CNRP ត្រូវបុរសម្នាក់តឿនឲ្យប្រកាសទ្រព្យសម្បត្តិ តែនាងតបវិញ....
កាលពីសប្ដាហ៍មុន អង្គភាពប្រឆាំងអំពើពុករលួយហៅកាត់ថា ACU បានចេញសេក្ដីជូនដំណឹងមួយ ដោយតម្រូវឲ្យសមាជិកក្រុមប្រឹក្សាឃុំ ចៅសង្កាត់ទាំងអស់ត្រូវប្រកាសទ្រព្យសម្បត្តិ និងបំណុលក្នុងរយៈពេលមួយខែបន្ទាប់ពីឡើងកាន់អំណាច។
ក្នុងសេចក្ដីជូនដំណឹងនោះសរសេរថា អង្គភាពប្រឆាំងអំពើពុករលួយ (អ.ប.ព) មានកិត្តិយសសូមជូនដំណឹងដល់សមាជិកក្រុមប្រឹក្សាឃុំ-សង្កាត់អាណត្តិទី ៤ ទាំង ២៥រាជធានី-ខេត្ត ឲ្យបានជ្រាបថា អ.ប.ព នឹងរៀបចំកម្មវិធីឲ្យមានការប្រកាសទ្រព្យសម្បត្តិ និងបំណុលក្នុងរយៈពេល ៣០ថ្ងៃ ក្រោយពីចូលកាន់មុខតំណែងដោយគិតចាប់ពីថ្ងៃទី ១៥ ខែកក្កដា ដល់ថ្ងៃទី ១៥ ខែសីហា ឆ្នាំ ២០១៧ និងធ្វើកិច្ចសហការជាមួយក្រុមជនបង្គោលប្រឆាំងអំពើពុករលួយ ផ្នែកមន្ត្រីរដ្ឋបាលស៊ីវិលរបស់រាជធានី-ខេត្តនៃក្រសួងមហាផ្ទៃពាក់ព័ន្ធនឹងការងារប្រកាសទ្រព្យសម្បត្តិ និងបំណុល។
បន្ទាប់ពីឃើញសេចក្តីប្រកាសនេះ អ្នកប្រើប្រាស់បណ្ដាញសង្គមហ្វេសប៊ុកមួយចំនួនដែលមានទំនោរទៅកាន់បក្សកាន់អំណាច តែងតែត្រូវគេឃើញចូលសួរបែបឌឺដងផ្ចាញ់ផ្ទាល់នៅលើគណនីហ្វេសប៊ុករបស់ចៅសង្កាត់វ័យក្មេងកំពុងលេចធ្លោកញ្ញា ស៊ិន ចាន់ពៅរ៉ូហ្សេត ជាបន្តបន្ទាប់។
បើយើងងាកទៅមើលខាងក្រោយបន្តិច ចៅសង្កាត់អូរចារ ក្រុងបាត់ដំបងខាងលើ ក៏ធ្លាប់ត្រូវមន្ត្រីជាន់ខ្ពស់គណបក្សប្រជាជន និងជាតំណាងរាស្ត្រមណ្ឌលបាត់ដំបងផ្ទាល់ លោក ឈាង វុន រិះគន់ដែរ រឿងយកថវិកាជាតិទៅចាក់ដីគ្រួសធ្វើផ្លូវ តែចោទថាធ្វើលំៗ មិនមានគុណភាព មិនបម្រើរាស្ត្រពិតប្រាកដ តែត្រូវមេឃុំតូចច្រឡឹងដដែលឆ្លើយតបវិញថា ថវិកាជាតិខ្លួនពុំទាន់ទទួលទេ តែជាលុយសប្បុរសជនជួយទៅវិញទេ រឿងរ៉ាវក៏ស្ងាត់ទៅវិញ។
រឿងមួយទៀត ធ្វើឲ្យមនុស្សមួយចំនួនចង់ដឹង គឺបន្ទាប់ពីឃើញកញ្ញាថតរូបជិះរថយន្ត ខណៈទើបឡើងកាន់តំណែងបានរយៈពេល ៤ថ្ងៃ ថា កញ្ញា រ៉ូហ្សេត បានរថយន្តមកពីណា ប៉ុន្តែកញ្ញាប្រាប់វិញថា ជាលទ្ធភាពខ្លួនឯង ជាអ្នកទិញសុទ្ធសាធ។
ចំណែកនៅល្ងាចមិញ កញ្ញា រ៉ូហ្សេត បានបង្ហោះសារត្រៀមខ្លួនចូលរួមកម្មវិធីរបស់វិទ្យុ VOA និងឲ្យអ្នកគាំទ្ររង់ចាំស្ដាប់ដោយសរសេរថា «ខ្ញុំក្នុងកម្មវីធី VOA នារាត្រីនេះ..! សូមបងប្អូនជនរួមជាតិ ពិសេសមិត្តនៅក្នុងបណ្តាញសង្គមហ្វេសប៊ុក រង់ចាំស្តាប់ទាំងអស់គ្នា នៅវេលាម៉ោង៨៖៣០នាទី នារាត្រីនេះ ខ្ញុំនឹងធ្វើជាភ្ញៀវកិត្តិយសVOA។ ថ្ងៃទី១៧ ខែកក្កដា ឆ្នាំ២០១៧»។
សារទាំងនេះ បានធ្វើឲ្យបុរសម្នាក់មានគណនីហ្វេសប៊ុកឈ្មោះ Samber Hem បានដាស់តឿនក្រើនរម្លឹករឿងខុសប្រធានបទដែលនាងសរសេរបង្ហោះពេលនេះទៅវិញថា «កុំភ្លេចប្រកាសទ្រព្យសម្បត្តិ និងចំណូលចំណាយផងណាចៅសង្កាត់អូរចារ»។ តែត្រូវកញ្ញាចៅសង្កាត់ឆ្លើយតបទាំងផ្អែមស្រទន់ បែបគោរពចាស់ទុំវិញថា «ចា៎ អរគុណបងប្រុស! ខ្ញុំប្រកាសពីរដងហើយ»។ ទោះយ៉ាងណា សំណួរមួយនេះត្រូវបានអ្នកគាំទ្រកញ្ញាចាត់ទុកថា ជាសំណួរតាមឈ្នានីស។ អ្នកប្រើប្រាស់បណ្ដាញសង្គមម្នាក់ទៀតតបថា «ម៉េចខ្លាចគេលួចដូចខ្លួនមែនទេ? ទៅប្រាប់មន្ត្រី CPP ផងទៅ ប្រាក់ខែតែបន្តិចបន្តួច តែមានវីឡា ឡាន ទំនើបៗ តើបានលុយពីណាមក កុំពូកែឈ្នានីសគេពេក»៕
Post a Comment